09.02.2021й. Ўзбекистон Агросаноат мажмуи ходимлари касаба  уюшмаси тизимидаги бошланғич касаба уюшма ташкилотлари раисларининг малакасини ошириш бўйича  «Бошланғич касаба  уюшмалари ташкилотларида иш  фаолиятини тўғри ва самарли ташкил этиш» мавзусида  ўқув — семинар  ўтказилди.

2020 йилда касаба уюшмалари иштирокида хотин-қизлар учун иш ўринлари яратиш мақсадида Денов туманида “Беш ўғлон Мамадалиевлар”масъулияти чекланган жамиятини  ташкил этишда зарур бўлган ускуналар олиш учун касаба уюшмалари маблағларидан 115,0 млн. сўм маблағ ажратилган эди.

Вилоят касаба уюшмалари ташкилотлари бирлашмаси раиси А.Ахмедов 2021 йилнинг 8 февраль куни корхона фаолияти билан танишиш учун корхонада бўлиб, ишчилари билан сухбатлашди.

Ташриф давомида корхонада 20 нафар кам таъминланган хотин-қизлар иш билан таъминланиб, ишчи ходимлар ўз вақтида ойлик маошлари билан таъминланаёганлиги, уларнинг меҳнат қилишлари учун шарт-шароитлар яратилганлиги кузатилди.

Раис ушбу корхонани янада кенгайтириш ва “Аёллар дфтари”га киритилган хотин-қизларни бандлигини таъминлаш борасида ўз тавсияларини берди.

2021 йил 8 февраль куни вилоят касаба уюшмалари ташкилотлари бирлашмаси раиси А.Ахмедов Денов тумани “Наврўздара” ҳудудидаги сўлим масканда қурилаётган 200 ўринли санаторияда олиб борилаётган қурилиш-монтаж ҳамда бу ерда ишлаётган қурувчиларга яратилган шарт-шароитлар билан танишди.

 

Вилоят автомобиль йўллари ҳудудий Бош бошқармасида Президент мурожаати, янги қабул қилинган қонунларни тарғиботи бўйича  Давра суҳбати ўтказилди, Унда Ўзбекистон касаба уюшмалари Федерацияси Кенгаши меҳнат хуқуқ инспектори З.Холов ва техник инспектори Д, Шукуровлар маъруза қилишди.

Ўзбекистон Республикаси Марказий банки Сурхондарё вилояти Бош бошқармасида жорий йилнинг 4 февраль куни давра суҳбати  ўтказилди. Давра суҳбатида Ўзбекистон касаба уюшмалари Федерацияси Кенгаши меҳнат хуқуқ инспектори З. Холов ва Давлат муассасалари ва жамоат хизмати ходимлари Термиз шаҳар Кенгаши раиси Н. Химматовалар катнашиб, Президент мурожаатномаси ва меҳнат қонунчилиги бўйича маъруза килишди.

Шеробод туманидаги «Sherobod star tekstil» МЧЖга касаба уюшмалари томонидан 400,0 млн. сўм берилган кредитга 55 та янги иш ўрни яратилган.  Жорий йилнинг 3 февраль куни вилоят касаба уюшмалари ташкилотлари бирлашмаси раиси А.Ахмедовнинг Шеробод туманига ташрифи чоғида «Sherobod star tekstil» МЧЖ иш жараëни билан танишди.

Жорий йилнинг 3 февралида Узун тумани  3,4–умумий  ўрта таълим мактабларида жамоа шартномасининг 2020 йилда бажарилиши якунлари бўйича жамоаларнинг умумий  йиғилишлари ўтказилди.

Меҳнат жамоасига иш берувчи, касаба уюшмасининг ҳисоботлари ўқиб эшиттирилиб, жамоа шартномасининг бажарилиши бўйича комиссиянинг далолатномаси билан таништирилди.

2021-2023  йилларга  мўлжалланган жамоа  шартномасининг лойиҳаси билан таништирилди.

 

Ўзбекистон Республикаси Вазирлар Маҳкамасининг 2018 йил 25 октябрдаги “Ўқувчи ва талаба ёшлар ўртасида ўтказиладиган Республика спорт мусобақалари тизимини янада такомиллаштириш тўғрисида”ги 864-сон қарори ижросини таъминлаш мақсадида “Универсиада” спорт мусобақалари дастуридаги спортнинг кураш тури бўйича Республика финал босқичи 2021 йил 1-5 февраль кунлари  Сурхондарё вилоятида ўтказилиши режалаштирилган.

Кураш – миллий ўзлигимизни акс эттирувчи спорт турларидан биридир. Ўз атамалари билан халқимизни бутун дунёга танитган ушбу спорт тури бўйича финал босқичининг Сурхондарё вилоятида ташкил этилишида ҳам рамзий маъно бор албатта. Азим полвонлар юрти бўлган Сурхон диёри яна баходирларни ўз бағрига чорламаоқда.

Ушбу тадбир муносабати билан бугун касаба уюшмалари тасарруфидаги “Амударё” болаларни соғломлаштириш оромгоҳида Республиканинг барча вилоятлардан мусобақада иштирок этиш учун ташриф буюрган 252 нафар спортчилар мутасадди ташкилотлар вакиллари ҳамда масъуллар томонидан тантанали кутиб олинди.

Қайд этиш керакки, замонавий типда бунёд этилган оромгоҳда спортчилар учун барча шароитлар муҳайё этилган. Жумладан, шинам ва ёруғ хоналар, юмшоқ ўрин-жойлар, ювиниш хоналари шаҳримиздаги хеч бир меҳмонхонадан қолишмайди. Қолаверса, 265 ўринга мўлжалланган ошхона ҳам меҳмонлар хизматига шай қилиб қўйилган.

Барчамизга маълумки сўнгги йилларда мамлакатимизда олиб борилаётган кучли ижтимоий сиёсат, шунингдек, хотин-қизлар ҳамда ёшлар бандлигини таъминлаш, уларга жамиятда муносиб шарт-шароитлар яратиш бўйича қатор ижобий ишлар амалга оширилмоқда.

Ўзбекистон Республикаси Президенти раислигида 27 январь куни ёшлар бандлигини таъминлаш ва бўш вақтларини мазмунли ташкил этиш чора-тадбирлари муҳокамаси юзасидан видеоселектор йиғилишида жамиятда ёшларнинг ролини ошириш ҳамда бандлигини таъминлаш масаласига эътибор қаратилди.

Бугунги кунда юртимиздаги ҳар бир ёшни бандлигини таъминлаш, уларнинг доимий даромад манбаига эга бўлишлари учун зарурий шарт шароитларни яратиб бериш масаласи ҳар қачонгиданда муҳим вазифалардан бирига айланди. Бугунги кунда мамлакат аҳолисининг 55 фоизини ёшлар ташкил этмоқда.  Ёшлар бандлигини таъминлаш омилларидан бири уларни талаб этилаётган касб бўйича ихтисослаштиришдир. ушбу масаласига тўхталинар экан, шу пайтгача ишсиз аҳоли ва бўш иш ўринлари ўзаро уйғунликда кўриб чиқилмагани танқид қилинди.

Давлат раҳбари ўз нутқида биргина, Тошкент шаҳрида 26 минг ишсиз ёш мавжудлиги, айни пайтда бу ерда 77 мингта вакант борлигига эътибор қаратиб, шундан 45 мингтаси олий маълумот талаб этилмайган иш ўринлари эканлигини қайд этилди. Шундай вакант ўринларга ёшларни касбга ўқитиш орқали малака тоифасини бериб, жойлаштириш лозимлиги таъкидлади.

Ўзбекистон Президентининг 2020 йил 13 октябрдаги “Аҳолини тадбиркорликка жалб қилиш тизимини такомиллаштириш ва тадбиркорликни ривожлантиришга доир қўшимча чора-тадбирлар тўғрисида”ги қарорига мувофиқ, дипломи йўқ, лекин амалий кўникмаси бўлган ишсиз ёшларни, малакани баҳолаш марказларида ўқитиб, сертификат бериш тизими жорий этилди.

Бандлик ва меҳнат муносабатлари вазирлиги “Ишга марҳамат” мономарказларида, шунингдек, қатор олий таълим муассасалари ва йирик саноат тармоқларида малакани баҳолаш марказлари ташкил этиш орқали жорий йилнинг ўзида 30 минг йигит-қизга малака сертификати бериб, уларнинг бандлигини таъминлаш бўйича тизимли ишларни амалга ошириб боради.

Бандликни таъминлашда энг катта захиралардан бири деҳқончилик қилиш учун ер ажратишдир. Шундан келиб чиқиб, эндиликда жойларда ҳар 10 гектар экин еридан 1 гектарини ёшларга деҳқончилик учун ажратиш тартибини жорий этилади.Шунингдек, қудуқлар қазиб, захира ерларни ёшларга фойдаланиш учун бериш, томорқада лимончилик, паррандачилик, қуёнчилик, асаларичилик қилишлари учун кредитлар ажратилади.

Йиғилишда ёшларнинг бўш вақтини мазмунли ташкил этиш, қобилиятини юзага чиқариши учун зарур шароитлар яратиш масалалари ҳам алоҳида эътибор қаратилди.

Жорий йилда мусиқа ва санъат мактаблари, маданият марказлари,  музейлар қуриш ҳамда таъмирлаш орқали уларда ёшлар қамровини 30 фоизга етказилади. Бунга, жорий йилда бюджетдан 150 миллиард сўм ажратилади.

Чекка ҳудудлардаги мактабларда намунавий тўгараклар ташкил этиш, ёшларни аждодларимизнинг бой маданий мероси билан яқиндан таништириш, улар ўртасида ички туризмни ривожлантириш бўйича кўрсатмалар берилди.

Жорий йилда соғлом турмуш тарзини кенг тарғиб этиб, спорт билан шуғулланувчи аҳоли сонини 25 фоизга, ёшлар қамровини 20 фоизга етказиш мақсад қилинган. Болалар боғчаси ва мактабларни спорт анжомлари билан жиҳозлаш учун бюджетдан 100 миллиард сўм ажратилган.

Мутасадди вазирликларга мактабларда 20 мингта спорт тўгарагини ташкил этиш, спорт федерацияларини, халқаро мусобақалар ғолибларини мактабларга бириктириб, ёшларни профессионал спортга жалб қилиш юзасидан вазифалар қўйилди.

Ҳозирги ёшларнинг замонавий технологияларга қизиқиши юқори. Ўтган йили IT-паркнинг 5 та филиали ва Рақамли технологиялар ўқув марказларида 10 мингдан ортиқ ёшлар сабоқ олган бўлса, жорий йил бу қамровни кенгайтириш мақсадида ҳар бир туманда камида биттадан мактабда IT-тўгараги очиш, яна 100 та Рақамли технологиялар ўқув маркази ташкил этиб, 20 минг йигит-қизни дастурлаш ва ахборот технологиялари соҳасида тадбиркорликка ўқитилади.

Йиғилишда ёшларнинг ижтимоий масалаларига ҳам алоҳида эътибор қаратилди. Бугунги кунда 129 та олий ўқув юртида 500 мингдан ортиқ талаба ўқиётгани, лекин улар ётоқхона билан етарлича таъминланмагани кўрсатилиб, талабалар уйларини кўпайтириш лозимлиги таъкидланди.

Давлатимиз раҳбари иқтидорли ёшларни кашф қилиш, уларнинг ташаббус ва интилишларини ҳар томонлама қўллаб-қувватлаш мақсадида “Ўзбекистон учун 100 ғоя” лойиҳасини илгари сурди. Лойиҳа доирасида шаҳар ва қишлоқлардаги ташаббускор ёшларнинг иқтисодиёт, таълим, спорт, соғлиқни сақлаш, ахборот технологиялари каби соҳалардаги ғояларини рўёбга чиқариш учун шароит яратилади.

Шуни ҳам қайд этиш лозимки, ёшлар ташаббусларини қўллаб-қувватлаш, уларнинг муаммоларини ҳал этиш юзасидан амалга оширлаётган ишларнинг ошкоралиги ва шаффофлигини таъминлаш мақсадида вилоят, шаҳар ва туман сектор раҳбарлари маҳаллий матбуот ва ижтимоий тармоқлар орқали ёшларнинг муаммо ва масалалари юзасидан қилган ишлари тўғрисида аҳолига ҳисобот бериб бориши тартиби белгиланди. Эндиликда, ёшлар бандлигини таъминлашда жонбозлик кўрсатган тадбиркорлар, ташкилотчи ва раҳбарларни рағбатлантириб бориш тартиби жорий этилади.

Умуман олганда биз янги Ўзбекистонни барпо этишга жазм қилган эканмиз, юртимизда учунчи ренессансни амалга оширишни олдимизга мақсад қилиб қўярканмиз албатта бу борада ёшларга эътибор қаратиш, уларни ташвишга солаётган муаммоларни бартараф этиш долзарб масалалардан бири бўлиб қолаверади.

Шарофиддин ТУРДИЕВ

Вилоят касаба уюшмалари ташкилотлари бирлашмаси

ёшлар масалалари бўйича раис маслаҳатчиси